ЗША ўвялі санкцыі супраць МЗКЦ за падтрымку ракетнай праграмы Пакістана
20.04.2024 / 1:8
Паводле новай заявы Дзярждэпа ЗША, Мінскі завод колавых цягачоў (МЗКЦ) сумесна з некалькімі кітайскімі кампаніямі дапамагаюць Пакістану вырабляць зброю масавага знішчэння.
«Мінскі завод колавых цягачоў пастаўляў шасі для спецыяльных транспартных сродкаў для пакістанскай праграмы далёкіх балістычных ракет. Такія шасі выкарыстоўваюцца Нацыянальным комплексам развіцця пры Мінабароны Пакістана (NDC) у якасці дадатковага абсталявання для запуску балістычных ракет», — паведамляе Дзярждэпартамент ЗША.
Акрамя МЗКЦ, у амерыканскі санкцыйны спіс трапілі і тры кампаніі з Кітая: Xi’an Longde Technology Development Company Limited, Tianjin Creative Source International Trade Co Ltd і Granpect Company Limited.
Іх таксама абвінавачваюць у перадачы ракетных тэхналогій і рухавікоў Пакістану.
Нагадаем, што МЗКЦ з 2022 года знаходзіцца пад санкцыямі ЗША з-за вайны ва Украіне.