«Малышка паспела толькі расплюшчыць вочкі». У Мінску немаўля памерла ад асфіксіі — медыкі не сталі рабіць кесаравага
4.02.2024 / 0:45
Здаровая цяжарнасць скончылася трагедыяй. У 5 радзільным доме Мінска ўрачы не сталі своечасова рабіць парадзісе кесарава — дзяўчынка атрымала цяжкую асфіксію і памерла на наступны дзень. Цяпер яе маці запісала зварот да Лукашэнкі з просьбай разабрацца ў сітуацыі і пакараць вінаватых.
Скрыншот відэа ў інстаграме lolly_ly
— Не піла, не паліла, выконвала ўсе рэкамендацыі жаночай кансультацыі, прыйшла ў радзільню ў прызначаны дзень, — кажа жанчына на відэа, якое нядаўна з'явілася ў інстаграме.
Для 31-гадовай Кацярыны Сухарукавай гэта была першая цяжарнасць, яна працякала без ускладненняў. Роды не пачаліся самі, таму жанчына прыехала ў радзільню ў дзень, які быў прызначаны ёй для планавай шпіталізацыі — 15 студзеня. Тэрмін цяжарнасці складаў 41 тыдзень і 1 дзень, плод быў даволі вялікім — больш за 4 кілаграмы. Аднак парадзісе сказалі, што паказанняў для кесарава сячэння няма.
На працягу двух дзён медыкі спрабавалі стымуляваць пачатак родаў спецыяльнымі таблеткамі, але гэта не спрацавала. Тады жанчыне прапанавалі стымуляваць радавы працэс спецыяльным гелем. Яна пагадзілася, але ў хуткім часе пашкадавала пра гэта рашэнне. Моцныя схваткі (такія, якія бываюць пры натуральным працэсе ў самым канцы родаў) пачаліся практычна адразу ж.
— Каля 14:30 я літаральна валялася на падлозе. Кардыятакаграфію запісвалі з цяжкасцю, ад сілы хвілін 10. Я дакладна памятаю, што ў малышкі была тахікардыя. Мне казалі, што гэта нармальна. Практычна да самага канца родаў дзіця не апускалася ў радавыя шляхі. Хоць дзіця спрабавалі апусціць, акушэрка ціснула мне на жывот. Мы так і не зразумелі, апусцілася ў выніку малышка ў таз ці не.
Праз некалькі гадзін медыкі пабачылі зялёныя воды. Але і ў гэты момант не сталі рабіць жанчыне кесарава. Бліжэй да ночы схваткі сталі згасаць, выцягваць дзіця прыйшлося вакуумам. Немаўля не заплакала.
— Загадчык радзільнага блока сказаў, што тонус добры, хаця дзіцячы рэаніматолаг сказаў, што нічога добрага няма. Дзіця адразу сталі рэанімаваць. Малышка паспела расплюшчыць і заплюшчыць вочкі. А 3-й гадзіны ночы мне паведамілі аб крывацёку ў лёгкім. Пазней было спыненне сэрца — яго ўдалося запусціць. Другое спыненне сэрца, яна, на жаль, не перажыла. Дзіця было поўнасцю на апараце, патрабавалася 99% кіслароду. У мяне адно пытанне: калі ўсё было ў парадку, дык чаму такі вынік? Чаму не было перагляду ў бок кесарава сячэння? Упэўнена, дзіця было б жывое.
Дачку, якая пражыла ўсяго некалькі гадзін, жанчына назвала Васілісай. Прычынай яе смерці пазначана цяжкая асфіксія — кажучы простай мовай, дзяўчынка доўга была без кіслароду.
У каментарыях да відэа некаторыя жанчыны пішуць, што таксама сутыкаліся з адмовай рабіць кесарава ў беларускіх радзільнях, з-за чаго ў дзяцей была асфіксія рознай ступені. У найлепшым выпадку потым дзіцяці патрабавалася працяглая рэабілітацыя.
Раней супрацоўніца аднаго з беларускіх радзільных дамоў каментавала «Нашай Ніве» жудасны выпадак у Салігорску, дзе ў аналагічнай сітуацыі (урачы не сталі своечасова зрабіць кесарава) немаўля атрымала цяжкую асфіксію і трапіла ў рэанімацыю.
Тады экспертка распавяла, што насамрэч такія выпадкі, на жаль, не адзінкавыя. А прычына трагедый гучыць цынічна і жудасна — урачы не хочуць сапсаваць статыстыку па колькасці кесарава.
Міністэрства аховы здароўя Беларусі патрабуе праводзіць кесарава не больш чым у 30% выпадкаў (а лепей, каб гэты працэнт ва ўстанове аховы здароўя быў яшчэ ніжэйшы) — гэта ўстаноўка на ўзроўні начмедаў, галоўных дактароў. Суразмоўца падкрэслівала: калі працэнт значна перавышае «норму», тады дастаецца ўсім у радзільні.
У дзяржаўных СМІ звяртаюць увагу, што ў Еўропе частата кесаравых сячэнняў даходзіць да 50%, у Лацінскай Амерыцы нават да 60%, затое ў Беларусі — каля 31%.
Чытайце таксама: